Приказна базирана на вистински сведоштва за судбините на политичките затворенички кои поминале низ женските затвори во Чехословачка во 1950-тите.

Настаните се поврзуваат со сегашноста преку два лика во книгата – Мажот со дупка во срцето и Негувателката на тие што умираат.

Во болницата за лица со терминални болести пристигнува нов пациент, Лудмила, со дијагноза која локалниот медицински тим не ја разбира. Негувателката се обидува да направи сè што е во нејзина моќ да ѝ помогне, но пациентката изгледа како да е обземена. Дали постарите жени прикриваат некое мрачно минато? Дали човековата злоба стои зад ова? И дали постои потреба да се истера ѓаволот од нивната совест?

Покрај суровоста на луѓето и општата неправда, ова е приказна и за силата на жената, мајчинството, староста. Насловот произлегува од географската локација на масовните гробници на жртвите од комунистичкиот режим, кои се наоѓаат „кај северниот ѕид“ на Ѓаволските гробишта во Прага. Романот разоткрива досега непознати детали за режимот што некои го сметале за добар, а чии извршители изјавуваат: само си ја вршев својата работа.