Кога дедото на Естер, Ханибал, ја купува куќата на "Палермовај", улица на данскиот остров Амагер, во 1921 година, тој си замислува дом исполнет со опера, боеми и опојна љубов како онаа наведена во моќната Песна над песните. Меѓутоа, за неговата невеста, руската акробатка Варинка, времето на чуда завршило во оној момент кога ја видела својата прва љубов како исчезнува во устата на нилски коњ кој, за да биде уште полошо, требало да биде слон и да стане нова ѕвезда во циркусот на татко и.

Ева, ќерката на Ханибал и Варинка, стјуардеса која сака гламур, а се чини и дека е видовита, почнува далеку пострасна љубовна приказна кога се вљубува во шведскиот скротител на гулаби Јан Густав. Така, потрагата на Ханибал по љубов и уметнички талент се пренесува на неговите внуки, близначките Естер и Олга, кои се натпреваруваат за епитетот млада уметница во семејството. Во меѓувреме, нивната постара сестра Филипа, повеќе сака да стане прва жена космонаут, но болеста прерано и го одзема животот.

"Кога животот ќе ти подметне нилски коњ" е трогателен и незаборавен роман за стремежот кон Љубовта на векот, за поднесувањето голема загуба и за давањето - и покрај се - уште една шанса на животот. Раскажана низ призмата на срамежливата сликарка Естер, оваа сага следи три генерации кои живеат под ист покрив, со повремени излети до париската оперска сцена и циркусот "Савалскаја" на периферијата на Санкт Петербург.

„Ако сте желни за авантура или сте во потрага по љубов, а секогаш не ја гледате светлата страна на животот, тогаш ова е вистинската книга за вас - блескава, фантастична, едноставна и неверојатна.“ - Femina