Еден врел јулски ден семејството се вози со автомобил, а потоа возачот наеднаш кочи и се случува кавга во која се откриваат застрашувачки тајни. Еден дождлив ден стигнува веста за смртта на член на семејството и за тестаментот според кој наследник станува и сосема непознат човек. Еден сосема обичен ден некој се сели од куќата и од корен се менува сѐ.

Романот „Љубовта е таа што не ја разбираме“ го создаваат три стории раскажани од перспективата на неименувана тинејџерка. Низ различни епизоди од нејзиниот живот, како случајно избрани вињети, авторот Мујарт го опишува кршењето на една дисфункционална фамилија и децата оставени да ги собираат нејзините семејни парчиња.