Безвременски роман за храброста, љубовта и трајната моќ на книгите, инспириран од вистинска приказна за неколкуте книжарници што го преживеале германското бомбардирање на Лондон за време на Втората светска војна.

Август 1939 година: Лондон се соочува со закана од претстојната војна со Германија, додека силите на Хитлер продолжуваат да напредуваат во Европа. Во овој вител на неизвесност влегува Грејс Бенет, млада девојка, која копнее за нов почеток на раздвижените лондонски улици, далеку од монотониот живот на село. Со желба да работи во стоковна куќа, не ни замислувала дека ќе се вработи во „Примроуз хил“, правлива, стара книжарница сместена во срцето на градот – зашто, на крајот на краиштата, никогаш не била голем вљубеник во пишаниот збор.

Преоптоварена со уредувањето на преполната книжарница, таа нема време да ги чита книгите што ги продава. Но, кога еден убав млад човек ѝ подарува книга пред да биде повикан во војна, она што започнува како обврска, станува страст што ја вовлекува во неверојатниот свет на книгите.

Додека секоја ноќ над градот се истура дожд од бомби, Грејс ја открива моќта на зборовите и читањето и ги обединува луѓето под закрила на книжарницата, црпејќи нова сила од магичните, книжевни светови – сила, што триумфира дури и над најтемните ноќи од војната...