Слушај внимателно, зашто ќе зборувам за душата, а душата си ти.

Актуелна и по осум века од нејзиното создавање, зрелата духовна поезија на Руми е инспиративна во современиот свет. Пренесувајќи ги тајните на суфизмот и природата, големиот персиски поет и мистик Џелалудин Руми создаде безброј стихови за божественоста, за љубовта и страста, копнежот и пријателството, за начинот на кој може да се постигне единство со возљубеното и секое ново духовно будење и откровение.

Проникнете во овие длабоко експресивни и неверојатно лирски стихови и трагајте по езотеричните вистини што ги знаат оние кои проникнале до најдлабоките бездни на човековата душа. Драги Михајловски, како еден од трагачите, успеа да ги пронајде и на совршен начин да го преслика целиот свет на Руми на македонски јазик. Надминувајќи ги материјалните граници на постоењето, поезијата на Руми ги обликува емоциите во мозаик во кој е претставено целокупното човеково искуство.

Отворете ги ушите што ѝ се дадени на душата за да слуша работи што умот не ги разбира. Дефиницијата на Руми за љубовта како „длабоко запаметен стих, нешто што никогаш нема да го заборавиш“ е дефиниција за сето она што е испишано на овие страници.