Осумнаесетгодишната Френсис, најмладата ќерка на Оливер Кромвел, водач на парламентарните сили во Англиската граѓанска војна, го наоѓа своето место во новиот центар на моќ на Англија.

По превирањата од Граѓанската војна, земјата полека се враќа во состојба на кревка стабилност. Таткото на Френсис се искачува на новата позиција на лорд протектор на Комонвелтот, и Френсис, која имала скромно детство, наеднаш се наоѓа во раскошните палати во Хемптон Корт и Вајтхол, каде што сонува дека сигурно на дворот ќе ја најде својата љубов.

Но, по обидот за атентат врз семејството Кромвел, Френсис сфаќа дека нејзината позиција е несигурна и опасна – а кога на татко ѝ официјално ќе му ја понудат круната, судбината на Френсис одеднаш добива дипломатско и династичко значење.

Дали таа ќе стане политички пион или можеби ќе го искористи својот нов статус за да ја преземе контролата и да ги реализира сопствените амбиции?