Ема, девојка која се крши под тежината на третата смрт во своето некогаш среќно четиричлено семејство, се враќа во семејната куќа, каде што се соочува со старите мириси, со познатото чкрипење на дрвените скали, но и со компјутерот на нејзиниот татко, во кој ги наоѓа белешките што тој ги запишал од своето истражување во врска со онаа најтрагичната и најмистериозната смрт, смртта на младиот Михал, братот на Ема.

И над неа и над читателот на овој роман надвиснуваат темните облаци од сите логични и нелогични објаснувања на случувањата од минатото.

Романот „Шајки“ е како филм – во најдобрата можна смисла. Приказната е наместа напната, наместа морничава, наместа толку интензивна што ќе ви треба неколку пати да вдишете длабоко пред да продолжите со читање на сцените што ќе оживуваат пред вашите очи.